 |
EL PROGRESO
16/12/2011
http://elprogreso.galiciae.com/nova/138046.html
Guímaro Motor aposta polo medio rural
O tecido social da Pobra do Brollón sempre se caracterizou polo seu alto nivel de actividade. No municipio conviven varios colectivos que non escatiman esforzos á hora de organizar iniciativas, desde a agrupación de veciños de Salcedo ou o colectivo xuvenil Os Felos aos habitantes da zona de Cereixa. Unha das últimas incorporacións á dinámica social é o club Guímaro Motor, que naceu no 2008 e que ao longo dos últimos meses protagonizou as iniciativas locais en favor da conservación e o respecto ao medio ambiente.
Guímaro Motor reúne a unhas 200 persoas amantes do mundo do motor -en concreto das motos de enduro, os quads ou os vehículos todoterreo- e do monte. Unha vintena de integrantes do colectivo, apoiados por veciños de Sober e Bóveda, puxeron en marcha un programa de colaboración coa Xunta de Galicia para vixiar o medio rural e colaborar na prevención de incendios.
O seu traballo é voluntario e consiste na limpeza de áreas montañosas durante todo o ano. Nas épocas máis proclives á actividade incendiaria céntranse nos labores de vixilancia grazas a unha emisora e a diferente material que lles achega a Consellería de Medio Rural.
Segundo apuntan os seus integrantes, organízanse de xeito sinxelo e a tarefa non é para eles unha carga porque gozan do que fan. Os voluntarios son afeccionados a facer rutas polo monte, polo tanto só necesitan de coordinación para repartirse as zonas das que hai que estar pendente. Ao seu favor xoga a experiencia e o dominio da xeografía.
«A maioría de nós naceu aquí, coñecemos cada camiño e cada carreiro, e iso é unha baza moi importante para orientarse ou saber de onde pode vir o foco dun lume só con ver o fume que produce», explicou Manuel Valcárcel, presidente do colectivo. Valcárcel insistiu en que a súa función é principalmente a vixilancia, dado que en caso de catástrofe non poden acceder a determinadas zonas se non contan co permiso correspondente.
As actividades de vixilancia non son as únicas que ocupan a este colectivo. De setembro a xuño organizan diferentes iniciativas dentro das que destacan as Xornadas Guímaras que inclúen unha ampla variedade de actos. Por exemplo, nunha das últimas xornadas o club contou cunha exhibición de Pedro Burgo.
O piloto guiou un Mitsubishi entre a natureza da zona. Pero, o curioso é que o día antes dese evento, Guímaro Motor promoveu unha limpeza colectiva de varias parcelas de monte da Pobra do Brollón. Na iniciativa participaron máis de 60 persoas, unhas a pé e outras motorizadas, que recolleron doce remolques de lixo, na que apareceron elementos de todo tipo, desde sofás a xoguetes, pasando por botellas ou latas. Todos os residuos trasladáronse ao momento limpo da Pobra do Brollón.
Como peche de xornada, os participantes compartiron unha cea a base de cordeiro asado ao estilo arxentino, algo que xa é un clásico entre eles.
Nos últimos meses, Guímaro Motor tamén aposta por estreitar lazos con outras formacións similares que se están organizando en municipios próximos. O seu reto é defender o monte e gozar do medio natural con total respecto.
DESENCONTRO
Oposición á lei de montes
Os clubs Off Road como Guímaro Motor mostran o seu desacordo coa lei de montes na que traballa a Xunta.
O conflito
ás agrupacións preocúpalles o artigo 88 do borrador do texto e unha alegación que se presentou a este punto e que, segundo apuntan, en principio está aceptada. O artigo 88 refírese ao uso e goce do monte por parte dos integrantes deste tipo de colectivos e a alegación que causou a polémica reclama que o artigo prohiba o acceso ao monte dos vehículos a motor con fins lúdicos.
Defensa
Os afectados apuntan que nos seus colectivos desenvólvense actividades tendentes a recuperar e conservar o medio natural e traballar a favor dun patrimonio que está abandonado e descoidado.
Consecuencias
Advirten que se se interpreta o texto en sentido literal tampouco se poderá acceder a pasear, recoller cogomelos, compartir unha comida ao aire libre ou outro tipo de actividades porque para achegarse ao monte úsanse coches e esas actividades tamén teñen un fin lúdico.
Imagen:
http://elprogreso.galiciae.com/arquivo/242855
|
| |
|
17/12/2011 13:33
Guímaro Motor aposta polo medio rural
